ಕವಿತೆ

ಮತ್ತೆ ನಾನು ನಾನಾಗಬೇಕಿದೆ,

ನಿನ್ನ ನೆನಪಿಂದ ಪಾರಾಗಬೇಕಿದೆ;

ಕನಸುಗಳ ಮಧುಪಾತ್ರೆ ಚೂರಾಗಬೇಕಿದೆ,

ಮತ್ತೆ ನಾನೀಗ ನಾನಾಗಬೇಕಿದೆ...

ಬದುಕು ಕೂಡಾ ನನ್ನ ಬಿಟ್ಟು,

ಮುಂದೆ ಸಾಗಿ ಹೋಗಿದೆ;

ನೀ ಭೇಟಿಯಾದ ಜಾಗದಲ್ಲೇ,

ನಾನಿನ್ನೂ ನಿಂತ ಹಾಗಿದೆ...

ಎದೆಯ ಮೇಲೆ ನಿನ್ನ ನೆನಪು,

ಸೋನೆಯಾಗಿ ಸುರಿದಿದೆ;

ಒದ್ದೆಯಾದ ಹೃದಯವೀಗ,

ನಿನ್ನ ಘಮವ ಚೆಲ್ಲಿದೆ...

ನಿನ್ನ ಜೊತೆಗೆ ಕಳೆದ ಸಂಜೆ,

ಕಣ್ಣಲ್ಲಿನ್ನೂ ನಿಂತಿದೆ;

ನಗಲು ಮರೆತ ತುಟಿಯ ಮೇಲೆ,

ನಿನ್ನ ಮುತ್ತು ಕುಳಿತಿದೆ..

ನನ್ನ ಕನಸು ದಾರಿ ತಪ್ಪಿ,

ನಿನ್ನ ಬೆರಳ ಹಿಡಿದಿದೆ;

ನನ್ನ ನಾನೇ ತಬ್ಬಬೇಕು,

ನನ್ನ ದುಃಖ ನನ್ನದೇ!

09/03/2012